Somos unha empresa familiar dedicada á apicultura e á obtención de produtos das nosas propias colmeas. Estamos na Ribeira Sacra Lucense, unha comarca cunha gran historia e tradición apícola onde, durante séculos, se obtiveron meles moi apreciados e de extraordinaria calidade.

Apostamos pola produción tradicional e artesanal, sendo de vital importancia para nós explicar os diferentes beneficios atribuídos ás abellas para salvar o noso planeta e levar a cabo a acción de polinización.

Para conseguir a mellor calidade dos produtos de colmea, coidamos moito o proceso de recolección, procesamento e envasado. Polo tanto, os nosos asentamentos e colmenares están situados en zonas pouco habitadas, coas condicións idóneas para obter un produto 100% orgánico e natural.

 O proceso de extracción do noso mel cru comeza coa colleita dos cuadros das nosas propias colmeas. Na sala de extracción, elimínase  a capa de cera (desopercular)e inmediatamente, introdúcese no extractor, que mediante forza centrífuga, expulsa o mel 100% natural. O produto resultante fíltrase das impurezas cunha malla fina e colócase en pequenas maduradoras, onde comeza a fase de decantación natural durante uns días. Deste xeito, elimínanse todos os sedimentos e burbullas de aire.